~~META:
title = Анегінская страфа
&keywords = анегінская, страфа
&abstract = Што такое анегінская страфа? Асаблівасці і прыклады ўжывання анегінскай страфы
&iftrue = nan
~~

====== Анегінская страфа ======
Анегінская страфа — створаная А. Пушкіным чатырнаццацірадковая [[слоўнік/страфа|страфа]] з [[слоўнік/рыфмоўка|рыфмоўкай]] //АбАбВВггДееДжж//.\\
Складаецца з трох цесна звязаных паміж сабой чатырохрадкоўяў з перакрыжаванай, сумежнай і апаясной рыфмоўкай і заключнага [[слоўнік/двухрадкоўе|двухрадкоўя]] — [[слоўнік/кода|коды]]. Дзякуючы мужчынскім рыфмам кода гучыць энергічна, мае звычайна афарыстычны характар і нярэдка выступае яшчэ ў функцыі [[слоўнік/пуант|пуанта]].\\
Анегінская страфа надзвычай ёмістая і гнуткая, што дапамагае лепшай перадачы эпічнага зместу вялікіх па аб’ёму твораў ([[слоўнік/паэма|паэма]], раман вершаваны).\\
А. Пушкін напісаў анегінскай страфой асноўны свой твор — вершаваны раман «Евгений Онегин» (адсюль і назва). Пазней ёю карыстаўся М. Лермантаў (паэмы «Тамбовская казначейша», «Моряк»), некаторыя іншыя рускія паэты.\\
Вось узор анегінскай страфы («Евгений Онегин», у перакладзе [[постаці/аркадзь-куляшоў|Аркадзя Куляшова]]):

Мой дзядзька правіл без заганы,\\
Калі не жартам занямог,\\
Усіх прымусіў да пашаны\\
І лепей выдумаць не мог.\\
Другіх той прыклад навучае;\\
Ды, божа мой, нуда якая\\
Пры хворым дзень і ноч сядзець,\\
Не адыходзіцца, нудзець!\\
Прытворства нізкае якое\\
Напаўжывога забаўляць,\\
Яму падушкі папраўляць\\
І лекі падаваць з тугою,\\
Ды моўчкі думаць сам сабе:\\
Калі ўжо возьме чорт цябе!

 


===== Падобныя старонкі =====
  * [[слоўнік/страфа]]