~~META:
title = Ампліфікацыя
&keywords = ампліфікацыя
&abstract = Што такое ампліфікацыя? Прыклады ампліфікацыі
&iftrue = nan
~~

====== Ампліфікацыя ======
Ампліфікацыя (ад лац. amplificatio — збольшанне, пашырэнне), або **накапленне**, — стылістычны прыём, сутнасць якога — у нагнятанні аднатыпных слоў ці моўных канструкцый ([[слоўнік/эпітэт|эпітэтаў]], [[слоўнік/параўнанне|параўнанняў]], [[слоўнік/сінонімы|сінонімаў]], злучнікаў, аднародных членаў сказа і г. д.).\\
Вельмі дарэчы ампліфікацыя (нагнятанне эпітэтаў, параўнанняў) выкарыстана ў вершы Дануты Бічэль-Загнетавай [[творы/данута-бічэль-загнетава/данута-бічэль-загнетава-роднае-слова|«Роднае слова»]]:

Я чула пяшчотнае, шчырасці поўнае,\\
Маё беларускае, роднае, кроўнае,\\
Такое раптоўнае, такое чароўнае,\\
Такое ласкавае, цёплае, чыстае,\\
Як сонца, агністае,\\
Як Нёман, празрыстае,\\
Як казка, быліна, як песня, жаданае,\\
Дагэтуль яшчэ ў жыцці неспазнанае,\\
Гарачае слова ад шчырага сэрца!

\\
Да ампліфікацыі звярнуўся і Алег Лойка ў паэме «Лясная песня». Тут асобныя вымоўныя прозвішчы і тапанімічныя назвы, якія «накапліваюцца» ў вершаваных радках, дапамагаюць стварыць непаўторны вобраз ляснога краю — Беларусі:

Там край лясны і людзі там лясныя:\\
Сасноўскія, Каліны, Лазнявыя,\\
Паддубскія, Дуброўскія, Дубягі,\\
Альхоўскія, Альшэўскія, Карагі;\\
І гарады лясныя там, і вёскі:\\
Залессі, Берастовіцы, Бярозкі,\\
Бярэзніцы, Дубровы, Дзераўныя,\\
Бары Святыя, Добрыя, Старыя;\\
І рэкі там лясныя: Дзеравянкі,\\
Бярозы, Лані, Бераставічанкі;\\
Дарогі там лясныя і азёры,\\
І знічкамі на лес спадаюць зоры...

\\
Адным з відаў ампліфікацыі з’яўляецца [[слоўнік/анафара|анафара]], калі яна праходзіць праз усе ці значную частку вершаваных радкоў:

Ты ж мая адзіная,\\
Ты ж мая ніўная,\\
Ты ж мая радзінная,\\
Ты ж мая жніўная,\\
Ты ж мая вясельная,\\
Ты ж мая вясенняя,\\
Ты ж мая нязваная,\\
Ты ж мая нязнаная,\\
Да грудзей прытуленая —\\
Матуліна...\\
([[постаці/генадзь-бураўкін|Генадзь Бураўкін]]. «Вяртанне песні»)