~~META:
title = Айрэн
&keywords = айрэн
&abstract = Што такое айрэн? Асаблівасці і прыклады
&iftrue = nan
~~

====== Айрэн ======
Айрэн — армянскі манастрафічны верш, усе чатыры радкі якога звязаны адной рыфмай.\\
Айрэны прыжыліся ў многіх лірычных [[слоўнік/мініяцюра|мініяцюрах]], у прыватнасці такіх, як надпісы, [[слоўнік/карацелька|карацелькі]] і г. д. Адным з найвыдатнейшых майстроў гэтай вершаванай формы быў ашуг XVІ ст. Наапет Кучак.\\
Айрэну адпавядае наш чатырохскладовік-манарым.

Ты напісала: «Вельмі мала бываю я з табой.\\
Не ведаю: благі ці добры, які характар твой...»\\
Мая дзяўчынка дарагая, самому ўнеспакой:\\
тады даведаешся, хто я, як будзеш ты са мной.\\
(С. Панізнік. «Айрэны»)

\\
Легендарную гісторыю ўзнікнення айрэна у сваім аднайменным вершы пераказвае [[постаці/максім-танк|Максім Танк]]:

Спрачаюцца: Кучак які\\
Стварыў айрэны на вякі,\\
Ці той, што родам быў з Вана,\\
Ці той, што родам з Акіна.\\
Тут толькі гурыі маглі б\\
Загадку гэту разгадаць,\\
Праверыўшы, хто на зямлі\\
З іх гарачэй мог цалаваць.