~~META:
title = Адухаўленне
&keywords = адухаўленне, празапапея
&abstract = Што такое адухаўленне ці празапапея? Прыклады адухаўленняў
&iftrue = nan
~~

====== Адухаўленне ======
Адухаўленне (**празапапея**) (ад грэч. prösopopoiíа – раблю твар) – перанясенне ўласцівасцей жывых істот на прадмет, абстрактныя паняцці, з'явы прыроды, рэчы.\\
У аснове адухаўлення ляжаць анімістычныя ўяўленні старажытнага чалавека, які ўсе прадметы навакольнага свету надзяляў здольнасцю мысліць і адчуваць.

Прыём адухаўлення характэрны не толькі вуснай народнай творчасці (казкам, песням), але і пісьмовай паэзіі. Напрыклад:

Цякла тут з лесу невялічка\\
Травой заросшая крынічка,\\
Абодва берагі каторай\\
Лазняк, ракіпцік абступалі;\\
Бруіліся ў цяньку іх хвалі\\
І ў луг чуць значнаю разорай\\
Ішлі спакойна між чаротаў,\\
Рабілі многа заваротаў,\\
Аж покі ў Нёман не ўцякалі.

([[постаці/якуб-колас|Якуб Колас]], «Новая зямля»)

\\
Ад шчасця сэрца скача, як дзіця,\\
Ад бед яно, як млын, шуміць начамі,\\
Варочае цяжкімі камянямі,\\
Падліваючы горычы жыцця.

([[постаці/аркадзь-куляшоў|Аркадзь Куляшоў]], «[[творы/аркадзь-куляшоў/аркадзь-куляшоў-ад-шчасця-сэрца-скача-як|Ад шчасця сэрца скача, як дзіця...]]»)

\\
А у нас на дрэвах срэбная луска:\\
Білі з хмары першыя фантаны.\\
Глоткі вуліц дождж прапаласкаў,\\
І яны рыкаюць апантана.

([[постаці/пімен-панчанка|Пімен Панчанка]], «[[творы/пімен-панчанка/пімен-панчанка-пачатак-вясны|Пачатак вясны]]»)

\\
Бачу я дарогу тую,\\
Па якой юнацтва йшло.\\
Песня,\\
Я тваё цалую\\
Галубінае крыло

(А. Александровіч, «Галубінае крыло»)\\