~~META:
title = Аднастрофны верш
&keywords = аднастрофны, верш
&abstract = Што такое аднастрофны верш? Асаблівасці і прыклады
&iftrue = nan
~~

====== Аднастрофны верш ======
Аднастрофны верш — [[слоўнік/верш|верш]], які не падзелены на асобныя [[слоўнік/страфа|строфы]] і ўяўляе сабой адно інтанацыйна-сінтаксічнае і сэнсавае цэлае. Уключае звычайна ад двух да васьмі вершарадоў (у большых па аб’ёму творах, як правіла, вылучаюцца меншыя страфічныя адзінкі).\\
Да аднастрофнага верша можна аднесці таксама [[слоўнік/санет|санет]] класічнага тыпу, у якім не толькі [[слоўнік/трохрадкоўе-тэрцэт|тэрцэты]], але і [[слоўнік/чатырохрадкоўе-катрэн|катрэны]] звязаны паміж сабой аднолькавымі рыфмамі.\\
Вось прыклады аднастрофных вершаў, якія змяшчаюць адпаведна ад двух да васьмі радкоў:

Слічна Галя Васілёва, слічна ды прыгожа:\\
Вочкі ясны, сама красна, як поўная рожа...\\
([[творы/максім-багдановіч/творчасць-максіма-багдановіча|Максім Багдановіч]])\\
\\
Раўнавага ці роспач?\\
Спакой ці трывога?\\
Завяршаецца год, быццам час\\
завяршаецца.\\
([[творы/алесь-разанаў/творчасць-алеся-разанава|Алесь Разанаў]])\\
\\
Глуха свіснуў камень прыдарожны.\\
Самалёты важка прагулі...\\
Асцярожна, людзі, асцярожна\\
З тым, што сёння можна на зямлі!\\
(А. Сербантовіч)\\
\\
Некалі суцішалі жазлом неспакойныя хвалі,\\
Але чым мне суцішыць у сэрцы тугу?\\
Ерыхонскія сцены ад трубаў грымучых упалі.\\
А я песняй разбурыць ніяк не магу\\
Сцен маўчання, якія цябе сцерагуць.\\
([[постаці/максім-танк|Максім Танк]])\\
\\
Я — камень, кінуты ў раку.\\
Кругі расходзяцца, кругі\\
Усё шырэй, шырэй, здаецца.\\
Ды раптам зыркне бліскавіца,\\
І ўжо не вочы ўбачаць — сэрца:\\
Усё шчыльней, шчыльней кругі.\\
([[творы/ніна-мацяш/творчасць-ніны-мацяш|Ніна Мацяш]]. «Памяці\\
Леаніда Якубовіча»)\\
\\
У белым-белым ты ў закутак мой\\
Зайшла і ціхай госцяй пасядзела,\\
Здалася мне чаромхаю лясной;\\
Цяпер табою поўны ўвесь пакой,\\
Нібы й была чаромхаю ты белай...\\
І мроіцца мне родны кут лясны\\
І ты, як госця з даўняе вясны.\\
(А. Русецкі)\\
\\
Мне спакой, як маленства, сніцца —\\
З бясконцым у сонцы гасцінцам:\\
Варочаюцца ледзь спіцы,\\
Пясок з абадоў бруіцца,\\
Быццам з адвечнага рога, —\\
Як гадзіннік пясчаны, дарога...\\
Пыл касмічны з-пад крылаў ракеты...\\
Маленства, дзе ты?..\\
(Алег Лойка)

 


===== Падобныя старонкі =====
  * [[слоўнік/цвёрдыя-формы-верша]]
  * [[слоўнік/акцэнтны-чыста-танічны-верш]]
  * [[слоўнік/акцэнтна-складовы-верш]]
  * [[слоўнік/каламыйкавы-верш]]
  * [[слоўнік/александрыйскі-верш]]